นอธิปติปจฺจยาทิ

[9] อชฺฌตฺตํ ธมฺมํ ปฏิจฺจ อชฺฌตฺโต ธมฺโม อุปฺปชฺชติ นอธิปติปจฺจยา…เป.… (อนุโลมสหชาตสทิสํ, นินฺนานากรณํ) นอนนฺตรปจฺจยา… นสมนนฺตรปจฺจยา … นอญฺญมญฺญปจฺจยา … นอุปนิสฺสยปจฺจยา, นปุเรชาตปจฺจยา – อรูเป อชฺฌตฺตํ เอกํ ขนฺธํ ปฏิจฺจ…เป.… อชฺฌตฺเต ขนฺเธ ปฏิจฺจ จิตฺตสมุฏฺฐานํ รูปํฯ ปฏิสนฺธิกฺขเณ อชฺฌตฺตํ เอกํ ขนฺธํ ปฏิจฺจ ตโย ขนฺธา กฏตฺตา จ รูปํ…เป.… ทฺเว ขนฺเธ…เป.… ขนฺเธ ปฏิจฺจ วตฺถุ, วตฺถุํ ปฏิจฺจ ขนฺธาฯ เอกํ มหาภูตํ ปฏิจฺจ…เป.… อาหารสมุฏฺฐานํ… อุตุสมุฏฺฐานํ… อสญฺญสตฺตานํ…เป.…ฯ

[10] พหิทฺธา ธมฺมํ ปฏิจฺจ พหิทฺธา ธมฺโม อุปฺปชฺชติ นปุเรชาตปจฺจยา – อรูเป พหิทฺธา เอกํ ขนฺธํ ปฏิจฺจ…เป.… ทฺเว ขนฺเธ…เป.… พหิทฺธา ขนฺเธ ปฏิจฺจ จิตฺตสมุฏฺฐานํ รูปํฯ ปฏิสนฺธิกฺขเณ (ปริปุณฺณํ) เอกํ มหาภูตํ…เป.… พาหิรํ… อาหารสมุฏฺฐานํ… อุตุสมุฏฺฐานํ… อสญฺญสตฺตานํ…เป.…ฯ

นปจฺฉาชาตปจฺจยาทิ

[11] อชฺฌตฺตํ ธมฺมํ ปฏิจฺจ อชฺฌตฺโต ธมฺโม อุปฺปชฺชติ นปจฺฉาชาตปจฺจยา, นอาเสวนปจฺจยา, นกมฺมปจฺจยา – อชฺฌตฺเต ขนฺเธ ปฏิจฺจ อชฺฌตฺตา เจตนาฯ อาหารสมุฏฺฐานํ… อุตุสมุฏฺฐานํ…เป.…ฯ (1)

พหิทฺธา ธมฺมํ ปฏิจฺจ พหิทฺธา ธมฺโม อุปฺปชฺชติ นกมฺมปจฺจยา – พหิทฺธา ขนฺเธ ปฏิจฺจ พหิทฺธา เจตนาฯ พาหิรํ… อาหารสมุฏฺฐานํ… อุตุสมุฏฺฐานํ…ฯ (1)

นวิปากปจฺจยาทิ

[12] อชฺฌตฺตํ ธมฺมํ ปฏิจฺจ อชฺฌตฺโต ธมฺโม อุปฺปชฺชติ นวิปากปจฺจยา (ปฏิสนฺธิ นตฺถิ), นอาหารปจฺจยา – อุตุสมุฏฺฐานํ… อสญฺญสตฺตานํ…เป.…ฯ (1)

พหิทฺธา ธมฺมํ ปฏิจฺจ พหิทฺธา ธมฺโม อุปฺปชฺชติ นอาหารปจฺจยา – พาหิรํ… อุตุสมุฏฺฐานํ… อสญฺญสตฺตานํ…เป.…ฯ (1)

อชฺฌตฺตํ ธมฺมํ ปฏิจฺจ อชฺฌตฺโต ธมฺโม อุปฺปชฺชติ นอินฺทฺริยปจฺจยา – อาหารสมุฏฺฐานํ… อุตุสมุฏฺฐานํ… อสญฺญสตฺตานํ… มหาภูเต ปฏิจฺจ รูปชีวิตินฺทฺริยํฯ (1)

พหิทฺธา ธมฺมํ ปฏิจฺจ พหิทฺธา ธมฺโม อุปฺปชฺชติ นอินฺทฺริยปจฺจยา – พาหิรํ… อาหารสมุฏฺฐานํ… อุตุสมุฏฺฐานํ… อสญฺญสตฺตานํ… มหาภูเต ปฏิจฺจ รูปชีวิตินฺทฺริยํฯ (1)

นฌานปจฺจโย

[13] อชฺฌตฺตํ ธมฺมํ ปฏิจฺจ อชฺฌตฺโต ธมฺโม อุปฺปชฺชติ นฌานปจฺจยา – ปญฺจวิญฺญาณสหคตํ…เป.… อาหารสมุฏฺฐานํ… อุตุสมุฏฺฐานํ… อสญฺญสตฺตานํ…เป.…ฯ (1)

พหิทฺธา ธมฺมํ ปฏิจฺจ พหิทฺธา ธมฺโม อุปฺปชฺชติ นฌานปจฺจยา – ปญฺจวิญฺญาณสหคตํ…เป.… พาหิรํ… อาหารสมุฏฺฐานํ… อุตุสมุฏฺฐานํ… อสญฺญสตฺตานํ…เป.…ฯ (1)

นมคฺคปจฺจยาทิ

[14] อชฺฌตฺตํ ธมฺมํ ปฏิจฺจ อชฺฌตฺโต ธมฺโม อุปฺปชฺชติ นมคฺคปจฺจยา… (นเหตุสทิสํฯ โมโห นตฺถิ) นสมฺปยุตฺตปจฺจยา… นวิปฺปยุตฺตปจฺจยา – อรูเป…เป.… อาหารสมุฏฺฐานํ… อุตุสมุฏฺฐานํ… อสญฺญสตฺตานํ…เป.…ฯ (1)

พหิทฺธา ธมฺมํ ปฏิจฺจ พหิทฺธา ธมฺโม อุปฺปชฺชติ นวิปฺปยุตฺตปจฺจยา – อรูเป…เป.… พาหิรํ… อาหารสมุฏฺฐานํ… อุตุสมุฏฺฐานํ… อสญฺญสตฺตานํ…เป.… โนนตฺถิปจฺจยา, โนวิคตปจฺจยาฯ

2. ปจฺจยปจฺจนียํ

2. สงฺขฺยาวาโร

[15] นเหตุยา ทฺเว, นอารมฺมเณ ทฺเว, นอธิปติยา ทฺเว, นอนนฺตเร ทฺเว, นสมนนฺตเร ทฺเว (สํขิตฺตํ, สพฺพตฺถ ทฺเว), โนวิคเต ทฺเว (เอวํ คเณตพฺพํ)ฯ

ปจฺจนียํฯ

3. ปจฺจยานุโลมปจฺจนียํ

[16] เหตุปจฺจยา นอารมฺมเณ ทฺเว…เป.… นวิปาเก นสมฺปยุตฺเต นวิปฺปยุตฺเต โนนตฺถิยา โนวิคเต ทฺเว (เอวํ คเณตพฺพํ)ฯ

อนุโลมปจฺจนียํฯ

4. ปจฺจยปจฺจนียานุโลมํ

[17] นเหตุปจฺจยา อารมฺมเณ ทฺเว, อนนฺตเร ทฺเว…เป.… มคฺเค ทฺเว…เป.… อวิคเต ทฺเว (เอวํ คเณตพฺพํ)ฯ

ปจฺจนียานุโลมํฯ

ปฏิจฺจวาโรฯ

2. สหชาตวาโร

(สหชาตวาโร ปฏิจฺจวารสทิโสฯ)

3. ปจฺจยวาโร

1. ปจฺจยานุโลมํ

1. วิภงฺควาโร

เหตุปจฺจโย

[18] อชฺฌตฺตํ ธมฺมํ ปจฺจยา อชฺฌตฺโต ธมฺโม อุปฺปชฺชติ เหตุปจฺจยา – อชฺฌตฺตํ เอกํ ขนฺธํ ปจฺจยา ตโย ขนฺธา จิตฺตสมุฏฺฐานญฺจ รูปํ…เป.… ทฺเว ขนฺเธ…เป.… ปฏิสนฺธิกฺขเณ (ปริปุณฺณํ)ฯ เอกํ มหาภูตํ…เป.… วตฺถุํ ปจฺจยา อชฺฌตฺตา ขนฺธาฯ (1)

พหิทฺธา ธมฺมํ ปจฺจยา พหิทฺธา ธมฺโม อุปฺปชฺชติ เหตุปจฺจยา – พหิทฺธา เอกํ ขนฺธํ ปจฺจยา ตโย ขนฺธา…เป.… ปฏิสนฺธิกฺขเณ…เป.… เอกํ มหาภูตํ…เป.… วตฺถุํ ปจฺจยา พหิทฺธา ขนฺธาฯ (1)

อารมฺมณปจฺจโย

[19] อชฺฌตฺตํ ธมฺมํ ปจฺจยา อชฺฌตฺโต ธมฺโม อุปฺปชฺชติ อารมฺมณปจฺจยา (ปฏิจฺจวารสทิสํ), จกฺขายตนํ ปจฺจยา จกฺขุวิญฺญาณํ…เป.… กายายตนํ ปจฺจยา กายวิญฺญาณํ…เป.… วตฺถุํ ปจฺจยา อชฺฌตฺตา ขนฺธาฯ (1)

พหิทฺธา ธมฺมํ ปจฺจยา พหิทฺธา ธมฺโม อุปฺปชฺชติ อารมฺมณปจฺจยา (ปฏิจฺจวารสทิสํ), จกฺขายตนํ…เป.… กายายตนํ…เป.… วตฺถุํ ปจฺจยา พหิทฺธา ขนฺธาฯ (1)

อธิปติปจฺจยาทิ

[20] อชฺฌตฺตํ ธมฺมํ ปจฺจยา อชฺฌตฺโต ธมฺโม อุปฺปชฺชติ อธิปติปจฺจยา… (วตฺถุํ อติเรกํ, ปฏิจฺจวารสทิสํ) อนนฺตรปจฺจยา… สมนนฺตรปจฺจยา… สหชาตปจฺจยา… (สหชาตวาเร ปริปุณฺณา) มหาภูเต ปจฺจยา…เป.… (มหาภูตานํ ขนฺธานญฺจ ปจฺฉา ปญฺจายตนานิ จ วตฺถุ จ กาตพฺพา) อญฺญมญฺญปจฺจยา… นิสฺสยปจฺจยา…เป.… อวิคตปจฺจยาฯ

1. ปจฺจยานุโลมํ

2. สงฺขฺยาวาโร

[21] เหตุยา ทฺเว, อารมฺมเณ…เป.… อวิคเต ทฺเวฯ

อนุโลมํฯ

2. ปจฺจยปจฺจนียํ

1. วิภงฺควาโร

นเหตุปจฺจโย

[22] อชฺฌตฺตํ ธมฺมํ ปจฺจยา อชฺฌตฺโต ธมฺโม อุปฺปชฺชติ นเหตุปจฺจยา – อเหตุกํ อชฺฌตฺตํ เอกํ ขนฺธํ ปจฺจยา ตโย ขนฺธา…เป.… อเหตุกปฏิสนฺธิกฺขเณ…เป.… ขนฺเธ ปจฺจยา วตฺถุ, วตฺถุํ ปจฺจยา ขนฺธาฯ เอกํ มหาภูตํ…เป.… อาหารสมุฏฺฐานํ… อุตุสมุฏฺฐานํ… อสญฺญสตฺตานํ…เป.… จกฺขายตนํ…เป.… กายายตนํ…เป.… วตฺถุํ ปจฺจยา อเหตุกา อชฺฌตฺตา ขนฺธาฯ วิจิกิจฺฉาสหคเต อุทฺธจฺจสหคเต ขนฺเธ จ วตฺถุญฺจ ปจฺจยา วิจิกิจฺฉาสหคโต อุทฺธจฺจสหคโต โมโหฯ (1)

พหิทฺธา ธมฺมํ ปจฺจยา พหิทฺธา ธมฺโม อุปฺปชฺชติ นเหตุปจฺจยา (ปวตฺติปฏิสนฺธิปิ มหาภูตาปิ กาตพฺพา) – จกฺขายตนํ…เป.… กายายตนํ…เป.… วตฺถุํ ปจฺจยา อเหตุกา พหิทฺธา ขนฺธาฯ วิจิกิจฺฉาสหคเต อุทฺธจฺจสหคเต ขนฺเธ จ วตฺถุญฺจ ปจฺจยา วิจิกิจฺฉาสหคโต อุทฺธจฺจสหคโต โมโหฯ (1)

นอารมฺมณปจฺจยาทิ

[23] นอารมฺมณปจฺจยา… นอธิปติปจฺจยา (สหชาตสทิสํ)… นอนนฺตรปจฺจยา… นสมนนฺตรปจฺจยา… นอญฺญมญฺญปจฺจยา… นอุปนิสฺสยปจฺจยา… นปุเรชาตปจฺจยา (ปฏิจฺจวารสทิสํ)… นปจฺฉาชาตปจฺจยา… นอาเสวนปจฺจยา… นกมฺมปจฺจยา…เป.… นวิปฺปยุตฺตปจฺจยา (ปฏิจฺจวารปจฺจนีเย วิปฺปยุตฺตสทิสํ)… โนนตฺถิปจฺจยา… โนวิคตปจฺจยา…ฯ

2. ปจฺจยปจฺจนียํ

2. สงฺขฺยาวาโร

[24] นเหตุยา ทฺเว, นอารมฺมเณ ทฺเว…เป.… โนวิคเต ทฺเวฯ

ปจฺจนียํฯ

3. ปจฺจยานุโลมปจฺจนียํ

[25] เหตุปจฺจยา นอารมฺมเณ ทฺเว, นอธิปติยา ทฺเว…เป.… นวิปาเก นสมฺปยุตฺเต นวิปฺปยุตฺเต โนนตฺถิยา โนวิคเต ทฺเวฯ

อนุโลมปจฺจนียํฯ

4. ปจฺจยปจฺจนียานุโลมํ

[26] นเหตุปจฺจยา อารมฺมเณ ทฺเว…เป.… อวิคเต ทฺเวฯ

ปจฺจนียานุโลมํฯ

ปจฺจยวาโร

4-6. นิสฺสย-สํสฏฺฐ-สมฺปยุตฺตวาโร

(นิสฺสยวาโร ปจฺจยวารสทิโสฯ สํสฏฺฐวาโรปิ สมฺปยุตฺตวาโรปิ วิตฺถาเรตพฺโพฯ)

7. ปญฺหาวาโร

1. ปจฺจยานุโลมํ

1. วิภงฺควาโร

เหตุปจฺจโย

[27] อชฺฌตฺโต ธมฺโม อชฺฌตฺตสฺส ธมฺมสฺส เหตุปจฺจเยน ปจฺจโย – อชฺฌตฺตา เหตู สมฺปยุตฺตกานํ ขนฺธานํ จิตฺตสมุฏฺฐานานญฺจ รูปานํ เหตุปจฺจเยน ปจฺจโยฯ ปฏิสนฺธิกฺขเณ…เป.…ฯ (1)